البيوت إللي مبتدخلهاش الشمس مخيفة
مقبضة وكريهة
مهما مهما حاولت تتحايل عليها تدفيك
حتى لو قدمت روحك فداء داست ببرودها عليك وأبداً
أبداً .. ما هاتدفيك ..!
^^^
كل حاجة حواليا بتصرخ وأنا لوحدي إللي سمعاها وعاملة روحي مش سمعاها
بفتكر أغنية سيد مكاوي " عشان المركب تقدر تمشي بيا وبيك .."
وإن كان " بيا " تحول إلي بيك وبيهم وبينا ...
وإن كنت أنا مبقتش أنا ولا عمري كنت أنا ...
وكل حاجة هنا مشوشة ..
النور .. الهوا .. من أمتى الهوا معادش ليه وجود والنفس الطالع .. طالعه معاه روحي .. والداخل داخل بوجع وكل القهر ..
ومن أمتي وبقيت بشوف كل حاجة شاهد قبر ...
ومن أمتي وكل الناس بتموت وأنا معرفش عنوان قبورهم ...
ولحد أمتي ؟
ولحد أمتي ؟ أمثل إني كويسة .. وإني سعيدة وإني فاهمة أنا فيا إيه ...
بداية من الأكلة في المطبخ .. لحد الخربوش في إيدي ...
مين خربشه ؟ مين كل يوم بيجرحني بسكينه غير إيدي ؟
ومين كل يوم وفي نفس الميعاد بيحط ع الجرح دوا غير أنا
صندوق أدويتي مل .. مل مني وأنا مليت من غطا الجروح المتعري ...
من االجلد التعبان ..
من التليفون إللي مبيجبش غير وجع ومصايب .. ولو حاولت أطلب منه ونس مالقيش ..!
من الوحدة والزهق والقرف من الكذب طول الوقت والكتم في القلب لحد ما طفح وأتملي سواد
يارب .. يارب أنا تعبت ..
ليست هناك تعليقات:
إرسال تعليق