كوستا ,, وبكار .. ومن قلبه وروحه إحتمال مصري .!

.....................................................................

....................................................................

ازيكم ..

 

برغم إني مرهقة جدا لكنه ذلك الإرهاق اللذيذ .. الذي يجعلك لا تستطيع أن تنام أو تستيقظ ..!

 

النهاردة كااااااااان يوم مرهــــــــــــــــق بشكل مش طبيعي بجد

 

وكالعادة ضغطي العزيز قام بالواجب بتاعه خير قيام ..!

 

لكن أكيد أنا مش جايه اكتب تدوينه واصدعكم عشان ضغطي .. يعني أكيد في حاجة أهم

 

Yes   في حاجة مهمة جدا .. أنا أتفسحت ..

 

ولمن يعرفني جيدا يعرف أني كائن كسول وغير اجتماعي بالمرة .. فا معني إني أفضي نفسي واخرج عشان أتفسح هو مجهود خرافي نظرا كمان لظروف عملي العصيبة

 

لكن ده تم وبجد كانت فسحة روعه ..

 

نظرا لوصول صديق عزيز قاهري وطبعا كان لازم نقوم بواجب الضيافة إياه لكنه بجد كان واجب ضيافة جميل وليس متعب ..

 

ما أسعدني بشدة أن هذا الصديق خفيف الظل حد الجنون من النوع الذي يجعلك تقهقه رغما عنك وأنت الشخص الخجول الذي يضحك مصادفة ..

 

صاحبنا القاهري ده بقه عنده عقدة من إسكندرية  وناس إسكندرية هههههههههه

 

المهم طبعا أخينا رمي في ملعبي الكرة بخصوص أي شيء وكل شيء وكل ما اسأله تحب تروح فين يا سيدي

يرد بكل هدوء

-         اللي يريحك

ولأنه أنا مخلوق صعب إراحته فواديته جراند بلازا علي سبيل إني أخرب بيته ويخرب بيتي ..

 

وأتضح إني أنا اللي ساذجة وصاحبنا مولااتي قديم وكفيهاتي جامد

 

وأول ما دخلنا قالي نقعد في كوستا كافية

طبعا أنا رديت بكل ثقة وقولت

-         لا هنا مفيش كوستا يا سيدي

-         لا طبعا في تعالي بس

ووصل لحد لوحة توضيحية للمول وقعد يبص وبعدين قالي

-         اهوه كوستا .. الدور الأرضي ..

هوب روحنا للدور الأرضي ووصلنا لكوستا ..وعم كوستا اليوناني ده عزيز عليا جدا ولي معاه ذكريات جميلة جدا هو وكارلوس كافيه .. المهم كوستا فرع جراند بلازا زحمة دخلنا قعدنا وطلبنا كابتشينو وقعدنا نذكر الافيهه الشهير بتاع أحمد حلمي ونور عن الكابتشينو

طبعا كلنا عارفينه

ثم ذكرنا الافيهه التاني بردوه بتاع احمد حلمي ومعتز صاحبه قرش كابتشينو يا معتز

اممم كل حاجة كانت ماشيه تمام طبعا طلبنا الحجم وأنا بقه زي الشاطرة طلبت الحجم الوسط

وقعدنا نقرا جزء من نفحة من الإيمان كتاب قصص قصيرة ليوسف السباعي

 

وإذ فجأة .. نري أمامنا جركل كابتشينو .. اييييييييه ده كل ده ده يتشرب علي كام يوم ده يا سيدنا

 

وصديقي يضحك وهو يري علامات الازبهلال علي وشي

 

واتكلت علي الله وقولتله

-         ده فنطاس كابتشينو ..

-         ههههههههههههههههههه

المهم قعدنا نشرب ونشرب .. ونشرب لصبح غد ههههههههههههه وبعدين طلبنا الحساب وفتح صديقي الشيك لقي تقيم ..

طبعا مش عايزة أقول انه قبل أي شيء العيال كانت حوالينا من كل جانب وانه كان في جنبينا أسرة مش مصرية فيها بنتين صغيرين فضلوا يعاكسونا وصديقي يطلق افيهات علي غرار

-         عشر دقايق وهانلقيهم بيلعبوا علي الترابيزة قدامنا

ده غير اللي ورانا واللي قدامنا واللي علي الجنبين لدرجة إني شكيت إننا في روضة أطفال مش في كوستا كافيه

 

صاحبنا بقه مسك التقيم وهات يا كتابة والله مايوريكم اللي كتبه

 

أولا يسألني إيه رأيك في كذا أقوله ممتاز .. يروح مدي 1 من 10

وعلي هذا المنوال

 

وبعدين يكتب في الملحوظات برجاء منع اصطحاب الأطفال مانعا باتا ههههههه

 

ايه رايك في الخدمة هل هي ودودة ؟

 

يقوم صاحبنا كاتب والله مالحقتش احكم

 

ومكتوب ايضا في التقيم اذكر رقم هاتفك يقوم كاتب لا مش عاوز إزعاج

 

العنوان .. لا مش هاتعرف توصل

 

وفضل صاحبنا يهيس في الردود وهو مش بيضحك نهائي وأنا ماسكه الضحكة بالعافية وأقوله إحنا مش هانديهم التقيم ده يقولوه عننا ايه ؟

 

طبعا هو أصر يحط التقيم اللي كله فضايح ده وأنا بضحك

 

وسبنا كوستا ومشينا برا بحيث نروح نتغدي طبعا لأنه الراجل مش جي يصوم في بلدنا

 

وإحنا ماشين لقينا كوستا تاني برا المول .. ضحكنا جدا وقلنا ندخل تاني واضح انه يوم كوستاوي معتبر لكننا طبعا فضلنا مؤمن

 

وفي نهاية هذا اليوم الشيق ركبنا عشان أروح زى الشطورة المهم ركبنا التاكسي وقعد صديقي جنب السواق اللي كان مشغل الراديو وعمال يذيع أغاني وطنية فضحكت وقلت إيه المناسبة أتضح في الأخر انه عيد تأميم قناة السويس تقريبا والله اعلم

 

وقبل ما أروح سمعت أغنية من قلبه وروحه مصري بتاعت بكار طبعا

 

وهنا ضحكت اوي وقلت لصديقي

 

    - ايوةةةة وأنا من يوم ما عرفتك أقول أنت تشبه مين بتفكرني بمين ايوة بكااار

 

وطبعا من هنا ورايح هاسميه بكار وهسأله عن أحوال رشيدة وهانتظر منه يقول هوي جومانا زي هوي أصحابي

 

لكن تعليق صديقي اللي أصابني بالشجن انه رد وقالي

 

-         آه جايز أنا شبه بكار بس لا من قلبي ولا روحي مصري ولا عايز النيل جوايا يجري أنا عايز اسيبها واهج

مردتش عليه وسكت ومظنش إني هالقي رد يمكن نلاقي عند عمو نظيف وعربيته البي أم دبليو اللي كانت واقفه منتظراه عشان ينزل من جراند بلازا ويشرفها

 

أظن انه صديقي وكلنا محتاجين نسأل السؤال ده

 

هو مين اللي لسه من قلبه وروحه مصري والنيل جواه بيسري ؟