الحياة بدون أنتي فيرس ..!

............................................................................

................................................................................................................

اشياء كثيرة أفكر فيها في الفترة الأخيرة ..

 

أشياء مفرحة وأخري غريبة ..

 

لست ممن يجيدون التحدث عن أنفسهم ( سبحان الله هو أنا كل مرة لازم أقول كده ؟ )

 

عزيزي أنت الضيف اللي بعد 10000 ايوة .. أنا عديت الضيف 10000 في ست شهور تدوين

 

***

عشر أيام من غير أنتي فيرس والحياة ليست بهذا السوء .. جهازي جهاز طيب القلب حنون علي احن من البشر ما كسفني قط بصراحة برغم انه ساعات بيزرجن .. وأخيرا توصلت لحل عبقري .. أشيل إلانتي فيرس وأعيش من غير فلتره لروحي وأفكاري وفيروساتي ..

 

خليها تمرح هنا وهنا وتلوث كل شيء في هذا العالم الكمبيوتري الملوث المليء بعصارة روحي من كتباتي وأغاني وأفلام لا يحبها غيري .. ولا يفهمها سواي ولا يحبها سواي

 

ونقول تاني الحياة من غير أنتي فيرس ..

 

ببساطة سئمت كل أنواعه .. خد عندك الكاسبرسكي .. والنورتون والنود والسمانتك وللأخير هذا معي قصص يشيب لهولها الولدان .. هو أنا شعري أبيض من شوية

 

واستطعت تصنيف العالم الغجر اللي فوق دول لعدة تصنيفات

 

كاسبر .. لا مش الشبح الودود ده ابن .. ما علينا

 

عم كاسبر الصعيدي منه لله بقه شرير ومفتري .. سطبته نتيجة نصيحة احد الأوغاد .. الشناقيط .. وهو الولد اللي موصلي النت .. ال ايه النت بطيء بسبب السمانتك ..!!!

 

وجربنا عم كاسبر اللي فكرني بالرجل ذو القيم و المباديء اللي بيصلي ويقوم يتفرج علي شاكيرا .!

 

عم كاسبر عمال يتقل الجهاز بحجة انه صفحة مدونتي فيها فيروس !!!

 

وطبعا كانت أيام من المعاناة السودة .. كل المواقع مهنجه ده غير فحيحه اللي فكرني .. بالتعابين ..

 

ده عن كاسبر ..

 

أما الأخ سمانتك .. الظالم .. فهو كالحاكم المستبد .. أو كعفريت العلبة ... لا منه ولا كفاية شره

 

كل ما اعمل بيه سكان يمسك نفس الأربع فيروسات ويقولي في درايف كذا وعملتلهم حجر صحي .. ولا ما يكون جهازي عنده الإيدز ..!

 

وسألنا عن النورتون والنود .. قالوه دول زي جامعة الدول العربية كلام كتير وكله علي مفيش

 

طب والحل ؟

 

ايه هاعيش زي فلسطين 60 عام من الوكسة الفيروسية . ؟ الانتي فيرسيه ولا إيه ..!

 

أنا قلت مفيش غير حل أخير .. شيلو جامعة الدول العربية .. قصدي الانتي فيرس .. واعمل صلح وتطبيع مع الفيروسات .. وبلاه الجدار العازل ده اللي عازلني أنا عن جهازي .. وكفيانا بقه شعارات رنانة. والاستقلال التام أو الموت الزؤام ..

واكتفيت بالصمت التام أو الموت الزؤام ..

وها عيش من غير انتي فيرس ..

مهو في ناس عايشه من غير لا ميه ولا هوا ..

مع الاعتذار لليلي مراد

 

***